Die Bybelgenootskap van Suid-Afrika het in Julie 2001 sy Bybel-per-Maand Klub begin. Dié klub verskil van ’n gewone boekklub waar lede elke maand vir ’n boek betaal. Bybel-per-Maand Klublede betaal maandeliks ’n bedrag sodat iemand anders die waardevolste boek wat ’n mens kan besit – die Bybel – kan ontvang.

Bybel-per-Maand Klublede se bydraes stel die Bybelgenootskap in staat om ten minste een Bybel vir iemand anders teen ’n bekostigbare prys beskikbaar te stel. Klublede help die Bybelgenootskap van Suid-Afrika om nie net Bybels aan die mense van ons land nie, maar ook vir Afrika en die res van die wêreld, te voorsien.

Bybel-per-Maand Klub projek vir Februarie 2012

Zulu Bybelvertaling

Zulu is die grootste taalgroep in Suid-Afrika. Dit is die moedertaal van meer as 10 miljoen Suid-Afrikaners. Die Bybel is wel reeds vir langer as 'n eeu in Zulu beskikbaar, maar dit is 'n dinamiese taal wat voortdurend ontwikkel.

Veranderinge in die taal bring mee dat veral jonger Zulusprekendes nie meer alles in die bestaande Bybel verstaan nie aangesien dit nie altyd geskryf is op die manier wat Zulu vandag gebruik word nie. Verder het vertaalkunde as wetenskap en dan spesifiek Bybelvertaalkunde, ook baie ontwikkel. Kennis van die brontale het ook baie uitgebrei.

Hierdie faktore het alles aanleiding gegee dat van die kerke wat die Zulu Bybel gebruik, die Bybelgenootskap versoek het om met 'n nuwe vertaling te begin. Daar is in Augustus 2009 daarmee begin.

'n Publikasie met proefvertalings van gedeeltes uit Genesis, Job, Spreuke, Jesaja, Jeremia, Esegiël, Romeine en 2 Korintiërs het onlangs verskyn. Lesers kan terugvoer gee en op dié manier die vertalers help.

Die vertalers werk tans lang ure om te verseker dat 'n goed verstaanbare vertaling van die volledige Bybel in moderne Zulu so gou as moontlik beskikbaar sal wees.

R837 016 word benodig om te verseker dat die werk in 2012 kan voortgaan.

Bid vir:

• die vertalers en hersieningskomitee wat met hierdie projek besig is
• die kerke wat met verwagting na die nuwe vertaling van die Zulu Bybel uitsien.